Кезәнә бәәҗ. Кер һалзн хуцта Кеедә гидг өвгн бәәҗ. Эн угатя өвгн һанцхн хуцан унад, хааһарнь цокад хавшулад, һуярнь цокад һавшулад һарад йовна. Зуурнь генткн нег хумха дал кевтҗ.

— Цагт маһд уга, кергтә чигн болад бәәдг, — гиһәд, далыг өвгн хавтхлчкад һарв. Асхн бүрүл дахад өвгн нег байна хотнд ирәд, хуцан уйчкад, герт орад ирхлә, байнахн цәәһән ууҗ бәәнә.

Өлссн өвгнд цәәһәсн күн өгсн уга.

Мал хотнд орсн хөөн байнахн бас махан чанв.

— Эн махнасн бас өгш уга бишв, — гиҗ санҗаһад, — би нег бичкн махтав, түүгән чанҗ идх хәәс өгит, — гив. Тиигхләнь: — Мана махнла чанад ид, — гиҗ байн келв.

— Махнтн махим идҗ оркхла яахув? — гиҗ өвгн келв.

— Мана махн махичнь идхлә, махан цугтнь өгнәв, — гиҗ байн келв. — Тиигхләнь, өвгн босад хумха далан күүнд үзүлл уга хәәснд тәвж оркв. Махиг болһад һарһхла, өвгнә дал нүдкн болна.

— Хәлә, махнтн махим идҗ, — гиҗ өвгн ярвна.

Байн арһ уга, келсн үгдән боогдад, махан цуһараһинь өвгид өгчкв. Өвгн махан идчкәд, хуцан архлх нег арһмҗ сурв.

— Хө күн архлдв. Хуцан хөөнлә хашад орулчк, — гиҗ байн келв.

— Хөөнтн хуцим идҗ оркхла яахув? — гиҗ өвгн келв.

— Хөөдм чини хуциг идхлә, хөөһән цугтнь өгнәв, — болна байн. Өвгн хуцан хашад орулв.

Әмтн цуһар унтв. Сөөднь өвгн босад, кер һалзн хуцан алад, хөөдиннь амнд цугтаднь цусинь түркәд, махинь нохаст өгч оркад, тагчг орҗ ирәд унтв.

Өрүнднь босхла, өвгнә хуц уга, хөөдин амн ху цусн: — Нә, хөөнтн хуцим идчкҗ. Би келлүв танд, ода хөөһән цугтнь өгтн, — болв.

Байн арһ уга болад, зөв хәләҗ инәһәд, буру хәләҗ ууляд, өвгнд хөөһән туулһад тәвб. Тиигәд өвгн дала хөөтә болад, амрад, җирһәд бәәнә.